LXIV. Hoe dat Moyses den tabernakel ende die priesteren wyde ende consacreerde

Hier na seldi merken hoe die priesteren gheconsacreert worden in der ouder wet, alsoe alse onse Here selve leerde Moysesse, ende sprac aldus: ‘Ghi selt nemen een calf van dien beesten die pleghen te arbeitene, ende ·ij· onbevlecte wedere¹, ende onverhavene broede², ende andere broede sonder heefsel verhart alse corsten³ ghecneden met olien; die derde maniere van broede sonder hefsel in olie ghebacken⁴. Dese broede seldi maken van taerwenre bloemen, ende die seldi doen in enen corf, ende seltse offeren. Dat calf ende die twe wedere, Aaronne ende sine sonen, die seldi toevoeghen toe der doren des tabernakels des ghetuuchs⁵. Ende alse ghi hebt ghedwaghen met watere den vader niet den sonen⁶, soe seldi Aaronne cleeden met sinen clederen, dat es met enen lijnnen clede, ende met enen tunikele, ende met den overscouderclede⁷, ende met den Redeleken. Ende dat overscoudercleet seldi toe dwinghen⁸ met enen gordele; ende die mitre seldi setten op sijn hoet, ende die heileghe plate boven die mitre; ende die olie der salvinghen seldi storten op sijn hoet, ende in deser manieren sal hi gheconsacreert werden. Ende sine sonen seldi hier toe voeghen⁹ ende ghi seltse cleeden met lijnnen rocken; ende ghi selt gorden met enen gordele Aaronne ende sine vrie wetteghe sonen¹⁰; ende ghi selt hen opsetten die mitren: ende si selen mine priesteren sijn in ewegher toeghevoechder uefeninghen van dogheden¹¹. Namaels alse ghi gheconsacreert hebt hare hande, soe seldi toevoeghen dat calf vore dat tabernakel des ghetuuchs¹². Ende Aaron ende sine sonen selen legghen hare hande op sijn hoet; ende dan seldijt doeden in die bescouwinghe ons Heren¹³, neven die dore des tabernakels des ghetuuchs. Ende dat calfs bloet dat ghi nemt, dat seldi doen met uwen vinghere op die hoerne des outaers; ende dat ander bloet seldi storten neven sine basche. Ende ghi selt nemen al dat vette dat die binnenste bedect¹⁴, ende dat netteken der leveren¹⁵, ende die ·ij· nieren, ende dat vette dat over hen es, ende dit seldi offeren te verberne op dien outaer. Dat vleesch dies calfs, ende sine huut, ende sijn mes¹⁶, dat seldi verberren buten den husen¹⁷, omme dat vore die sonde es. Ende ghi selt nemen enen weder, ende daer op sal Aaron ende sine sonen legghen hare hande; ende alse ghi dien ghedoet hebt, soe seldi nemen van sinen bloede, ende dat seldi storten op dien outaer. Ende dien selven weder seldi sniden in stucken, ende alse sine binnenste ghedwaghen sijn ende sine voete¹⁸, soe sel- dise legghen op dat ghesnedene vleesch¹⁹ ende op sijn hoet, ende altemale desen weder seldi offeren in den viere op den outaer. Dese offerande ons Heren es die alre soetste roke der sacrificien Goods²⁰. Ende ghi selt noch nemen den anderen weder, ende daerop sal Aaron ende sine sonen legghen hare hande; ende alse ghi dien gheoffert hebt, soe seldi nemen van sinen bloede, ende dat seldi doen op dat leste der rechter oren²¹ Aarons ende sijnre sonen, ende op die dumen haerre hande ende haers rechts voets. Ende dat bloet seldi storten op dien outaer al omme ende omme. Ende alse ghi ghenomen hebt van dien bloede dat op dien outaer es, ende van der olien der salvinghen, soe seldi bespraeien²² Aaronne ende sine cledere, sine sonen ende hare clederen. Ende alsi aldus gheconsacreert sijn, ende hare eledere, dan seldi nemen dat vette van dien weder ende sinen steert, ende dat vette dat bedecte die binnenste, ende dat netteken der leveren, ende die ·ij· nieren ende dat vette dat over hen es, ende die rechte scoudere, omme dat ·j· weder es der consecratien²³. Ende ghi selt nemen ·j· broet van der eenre manieren, ende noch ·j· broet van der andre manieren met olien gecneden, ende dat derde broet van der derder manieren, ende al van dien corve der onverhavenre broede²⁴, die gheset es in die beschouwinghe ons Heren. Ende alle dese dinghe seldi legghen op die hande Aarons ende sijnre sonen, ende die seldi heilech maken op heffende vore den Here²⁵. Ende dan seldi alle dese dinghe ontfaen van haren handen, ende seltse altemale verberren op dien outaer²⁶, den alre soetsten roke in die bescouwinghe ons Heren, want dit es sine offerande. Ende ghi selt nemen dat borstken²⁷ van dien wedere daer Aaron mede gheconsacreert es, ende dat seldi heileghen ende op heffen vore den Here, ende dat sal vallen in Aarons deel²⁸. Ghi selt heilech maken dat gheconsacreerde borstken, ende die scoudere die ghi van dien wedere ave deilet²⁹, daer Aaron mede beghonnen es³⁰ ende sine sonen. Ende dese dinghe selen ghevallen in Aarons deel ende sijnre sonen, in eweghen rechte van den kinderen van Israel: want dese dinghe sijn vorenemende³¹, ende beghinne van haren paismakenden offeranden³², die si Gode offeren. Dat heileghe cleet dat Aaron orboren sal³³, dat selen sine sonen hebben na heme, dat si daer inne ghesalft werden³⁴, ende hare hande gheconsacreert werden. Seven daghe sal hi dese dinghe uefenen, die van sinen sone bisscop wert gheset vore heme³⁵, ende die ingaen sal in den tabernakel des getuuchs op dat hi dienen moghe in den heilechdome. Ghi selt nemen den weder der consecratien, ende selt sieden sijn vleesch in ene heileghe stat³⁶, ende daer ave sal eten Aaron ende sine sonen. Ende si selen eten die broede, die in den corf sijn, in dat parvijs des tabernakels³⁷ des getuuchs, op dat die sacrificie behaechlec si³⁸, ende op dat gheheilecht werden die hande der gheenre die offeren. Ende gheen vremt mensche en sal hier ave eten, want dese dinghe sijn heilech. Eest dat daer iet over blijft van dien gheconsacreerden vleesche ochte van den broeden, tote der marghenstonden, die relieve seldi verberren in den viere³⁹: si en selen niet gheeten werden, want si sijn gheheilecht. Alle die dinghe die ic u gheboden hebbe over Aaronne ende over sine sonen, die seldi doen. Ghi selt hare hande consacreren ·vij· daghe: ende alle daghe seldi offeren wen calf, omme die sunde te purgeerne⁴⁰. Ende ghi selt reine maken den outaer, alse ghi offert die hostie der suveringhen⁴¹; ende ghi selt den outaer salver in heilecheiden⁴². ·Vij· daghe seldi suveren den outaer ende heileghen; ende hi sal sijn heilech der heileghen. Ieghewelc diene gherijnt⁴³, hi sal gheheilecht werden. Dit es dat ghi doen selt in den outaer: alle daghe erensteleke twe jareghe lammere, ·j· lam des marghens vroech, ende dat andere te vespertide⁴⁴, dat tiende deel der tarwenre⁴⁵ bloemen met ghestampter olien bespraeit⁴⁶; die olie sal hebben ene mate, dat vierde deel van dire maten die men noemt hin⁴⁷, ende wijn te offerne der selver maten in enen lamme⁴⁸. Dat ander lam seldi offeren te vespertide na die maniere der vorster offeranden⁴⁹, ende na die maniere die wi gheseghet hebben, in den roke der soetecheit. Dit es ene sacrificie den Here, met eweghen offere in uwe gheslachten⁵⁰.’

Die Here hevet ghesproken tote Moysesse ende seide: ‘Stant toe der dore des tabernakels des ghetuuchs vore den Here, daer ic di setten sal, op dat ic spreken moghe tote di⁵¹. Ende daer salic ghebieden den kinderen van Israel, ende die outaer sal gheheilecht werden in mine ere⁵². Ende ic sal heilech maken dat tabernakel des ghetuuchs met dien outare, ende Aaronne met sinen sonen, op dat si mi dienen moghen in priesterscape. Ende ic sal wandelen in die middelt der kindere van Israel, ende ic sal hen God sijn⁵³: ende si selen weten dat ic ben hare Heere ende hare God, diese gheleidet hebbe ute Egypten lande, op dat ic bliven soude onder hen, ic hare Heere ende hare God⁵⁴.’

Hier na dede Moyses alsoe alse heme onse Here gheboet. Ende doe alle die scare vergadert was vore die doren, doe seide hi: ‘Dit es die leringhe die onse Here gheboet dat ghescien soude.’ Ende staphans⁵⁵ soe brachte hi Aaronne ende sine sonen; ende alse hise ghedwaghen hadde, soe cleede hi den bisscop met enen lijnnen clede; ende gurdene⁵⁶ met enen gurdele; ende hi dede hem ane ·j· jacinctinen tunikeel; ende daer boven dede hi heme ane dat scoudercleet, dat dwanc hi toe met enen gurdele. Ende daer toe voechde hi dat Redeleke, daer in was Leringhe ende Waerheit; ende sijn hoeft bedecte hi met der mitren; ende boven die mitre, jeghen sijn vorehoede, soe dede hi die guldene plate gheconsacreert in heilecheiden, alsoe alse onse Here heme gheboden hadde; ende hi nam die olie der salvinghen, ende daer mede salfde hi dat tabernakel, met al dien dat daer toe behoerde. Ende al beheileghende soe bespraeide hi den outaer ·vij· werf, ende doe salfde hine, ende alle sine vate; ende dat lavoer met sijnre bascen maecte hi heilech met olien; ende die olie storte⁵⁷ hi op Aarons hoet, ende salfdene ende consacreerdene. Ende doe sine sone vortbracht waren, doe cleede hise met lijnnen rocken, ende gurdese met enen gurdele, ende sette hen op die mitren, alsoe alse onse Here gheheten hadde.