LIII. Vanden viere regghelen der stene ende der artikelen ons gheloefs

Dese twelef steene, metten twelef namen der kindere van Israel, stonden in dat Redeleke, vore die borst des oversten priesters in ·iiij· ordenen, dat es in ·iiij· regghelen: in elke regghele ·iij· stene, met drien namen. Ende daer stont mede inne ordeel, leringhe ende waerheit. Alsoe ghelikerwijs selen staen die twelef artikelen, met den levene der ·xij· apos- telen, in die verlichte redene eles prelaets ende elcs verlichs menschen, in ·iiij· ordenen: in elke ordene ·iij· artikelen. Soe mach hi gheven recht ordeel, ende leren de waerheit. Die ierste ordene leert ons in den gheloeve enen God in drien personen, den almechteghen Vader, ende sinen eneghen Sone, ende dien selven ontfaen van den heileghen Gheest, gheboren in onsen vleesche van der maecht Marien. Die andere ordene leert ons dat die solve Sone ghepassijt es onder Ponciusse Pilatuse, ghecruset, doet ende begraven, nederghevaren ter hillen, des derdes daghes op verstaen van der doet, op ghevaren ten hemelen, ende sit ter rechter hant sijns almechtechs Vaders. Die derde ordene leert ons dat hi heir na comen sal ordelen levende ende doede, ende dat wi vaste selen gheloeven in den heileghen Gheest, ende dat die eneghe heileghe Kerke es ghemeine. Die vierde ordene leert ons dat wi gheloeven selen ghemeininghe der heileghen, verlatenesse der sonden, op verstannesse onser lichamen, ewech leven. Dit gheloeve, met den werken die ghi ghehoert hebt, sal cieren ende verlichten onse redene, ende sal ons leiden boven redene in die bloete waerheit. Daer sal ons ghenoeghen¹.