LXV. Vanden sacrificien der nuwer wet

Siet, dit was die maniere der consecracien ende der sacrificien in der ouder wet, die Moyses ordineerde overmids dat ghebot ons Heren: ende dese maniere was Gode behaechlec, tote dier tijt dat Christus selve consacreerde dat heileghe Sacrament sijns lichamen, ende dat hi heme selven offerde ene werdeghe sacrificie op dien outaer des crucen. Doe maecte hi met siere doet, ende met sire verdienten, die heileghe salve daer wi alle mede ghesalft sijn; ende doe verloes Moyses salve hare heilecheit. Want doen die nuwe Sacramente inquamen¹ die waerheit ende leven met hen brachten, doe moesten die oude cesseren, die maer figure ende tekene en waren der toecomender waerheit, die si bedieden, daer wi nu inne leven.