LXVI. Vander opverstennessen ende openbaringhen Christi

Ende hier omme, doen Christus met sijnre doet onser alre salve ghemaect hadde, ende hi op verstaen was in die glorie sijns Vader, ende sijns selfs, ende alle sijns volcs: doen woude hi sine priesteren die apostelen consacreren, ende quam tote hen in beslotenen doren, ende stont in midden hen, ende sprac: ‘Vrede si met u¹;’ ende toende hem sine hande, ende sine side, ende sine voete, ende seide tote hen: ‘Siet mine hande ende mine voete, want ic bent selve; tast ende siet want negheen gheest en heeft vleesch no been, alsoe alse ghi mi siet hebben².’ Ende doe seide hi anderwerf tote hen: ‘Vrede si u. Ghelikerwijs dat mi mijn Vader sende, soe sende ic u³.’ Ende doe blies hi in hen ende seide: ‘Ontfaet den heileghen Gheest. Dien ghi hare sonden verlaet, dien werdense verlaten; ende dien ghise onthout, dien werdense onthouden⁴.’ Maer hier ghebrac Sinte Thomaes, ende hier omme, over ·viij· daghe daer na, soe warense alle vergadert ende Thomaes met hen. Ende onse Here quam weder te hen, beslotenre doren, ende sprac: ‘Vrede si met u.’ Ende doe seide hi tote sinte Thomase: ‘Bringhe hare dinen vingher⁵, ende sich ane mine hande; ende nem dine hant ende legse in mine zide, ende en wes niet onghelovech maer ghetrouwe.’ Daer na oppenbaerde hi heme noch sinen jongheren op die zee daer si vesschen waren⁶, ende daer seide hi tote sinte Petre aldus: ‘Simon, Jans sone, minstu mi meer dan die andere apostelen doen⁷? Symon Johannis (dat es alsoe vele gheseghet alse du best ghehoersam, ende sone der gracien Goods⁸) minstu mi meer dan dese?’ Driwarf vraghede hijs heme, ende driwarf antwerde sinte Peter dat hine minde; want hi hadde vore driwarf sijns gheloghent: ende driwarf gheboet heme onse Here dat hi sine scape, dat es sijn volc, voeden soude. Ende dit dede hi met sijnre leringhen, ende met sinen levene, ende oec met siere doet. Ende die doet voreseide hem Christus doe, ende maectene prince ende vorste boven die andere apostelen, ende boven alle die werelt. Daer na oppenbaerde heme onse Here weder allen sinen apostelen in Galileën, op den berch van Thabor, ende seide tote hen aldus: ‘Alle macht es mi ghegheven in hemel ende in erde: ende daer omme gaet ende leert alle menschen, ende doepse in den name des Vaders ende des Soens ende des heilegen Gheests; ende leert hen te houdene alle die dinghe die ic u gheboden hebbe. Siet ende ic ben met u alle daghe, tote den inde der werelt⁹;’ dat es te verstane met sijnre gracien, ende met den heileghen Sacramente sijns lichamen. Ten lesten male, op dien dach dat hi op varen woude in den hemel, soe vertoende hi heme allen sinen apostelen, daer si ter tafelen saten, ende seide tote hen aldus: ‘Ic sal senden in u die gheloefte mijns Vader¹⁰. Sidt in dese stat, tote dire tijt dat ghi ghecleedt wert van boven met crachte; ende dan gaet alle die werelt dore, ende predect dat Ewangelium ieghewelker creaturen, dat es allen menschen. Die gheloeft, ende ghedoept wert, hi sal behouden sijn; die niet en gheloeft, hi sal verdoemt werden¹¹.’