LXVIII. Van Cinxen

Ende over ·x· daghe daer na, dat was die viftechste dach na dat hi op verstont, dat es onse cinxendach, doe waren si alle vergadert in die stat van Jherusalem, op den berch van Syon, in dat selve huus daer si met onsen Here dat paeschlam gheten hadden, ende daer hi hen sijn vleesch ende sijn bloet gaf in spisen ende in dranke. In desen huse plaghen si te gadere te comene; ende doe si alle vergadert waren, soe quam van den hemel ·j· groet gheruusch, alse van enen starken winde, die al dat huus vervulde, daer si inne saten. Ende doe oppenbaerden hen daer ghesplette tonghen alse vier, ende dat vier raste op ieghewelken, ende si worden alle vervult met den heileghen Gheeste, dat es met der minnen Goods. Ende die minne trac met hare den Vader ende den Sone, ende aldus ontfinghen si die heileghe Drivoldecheit.

Ende dit merke wi in die ·iij· uutwendeghe tekene die hen daer God vertoende: si hoerden ·j· groet gheruusch van winde, ende si worden vervult met der moghentecheit dies Vaders, die hen anxt ende vrese ave nam, alsoe dat si niemanne en ontsaghen, ende in sijnre cracht alle dinc vermochten. Si saghen ghesplette tonghen op ieghewelken. Hier mede verstaen wi die wijsheit des Soens die si ontfinghen, alsoe dat si alle waerheit verstonden, ende alle doghede leerden ende leefden¹, ende met allen tonghen spraken in wat lande dat si quamen. Voertmeer, dat vier dat si saghen rasten op ieghewelcs hoet, dat leert ons dat si die minne Goods ontfinghen, alsoe crachtech, dat si in tijt noch in ewecheit nimmermeer gheblust en mochte werden.

Ghi selt weten dat Christus gaf sinen apostelen sinen gheest driwerven ende in drien manieren: hi gaffene hen eer hi starf, miraculen mede te werkene alse die sieke te ghenesene, die viande te verdrivene², die doede op te weckene. Dit waren lijfleke werke, want si minden noch doe onsen Here met ghevoelleker lijfleker minnen. Anderwerf gaf hi hen sinen gheest, doe hi op verstaen was van der doet, gheesteleke werke mede te werkene, alse doepen, ende sunden vergheven, ende die waerheit te leerne; want doe ghinc hare gheesteleke minne boven die lijfleke minne. Derdewerf gaf hi hen sinen Gheest, doe hi ghevaren was in den hemel, ende dit was godleke werke mede te werkene, ende met Gode een te sine; want si besaten doe Gode in minnen, ende si worden van heme beseten in der selver minnen. Want doe wart hare minne drivuldech: si minden Gode ute al dier herten, lijfleke ende ghevoeleke; ende si mindene ute al der zielen ende met al den crachten gheestelec ende redelec; ende si mindene in alle der ghedachten, godlec, ontsinkende hen selven in enecheiden. Ende daer mede ontsinghen si den heileghen Gheest, overvloeiende alsoe, dat sine voert gaven anderen menschen; want si worden doe soe rike Goods, dat sinte Peter allene op dien selven dach bekeerde ·m· menschen ten ghelove. Ende aldus worden si ghewijt ende ghesalft in den heileghen Gheeste; want die heileghe Gheest es selve die salve die ons Christus verdient heeft met sire doet. Ende hier omme sijn wi alle ghedoept ende ghesalft in die doet Christi, ende in den heileghen Gheeste; maer niet ghelijc³: want et sijn vele graden in heilecheiden. Want wi vinden dat Christus consacreerde ·xij· bisscope van sinen apostelen, ende die andere ·lxxij· jongheren maecte hi alle priesteren, ende si ontfinghen alle die salve des heilighen Gheestes. Maer in die bisscoppe storte hi sinen Gheest alsoe overvloeiende, dat hi van binnen dore hen udewert vloeiede alle die werelt dore, alsoe dat wijs noch alle ghenieten mogen. Ende ghene andere olie noch crisme en orborde Christus doe hi sine bisscoppe ende sine priestere wijde; maer omme reverencie ende werdecheit der sacramente, soe heeft die heileghe Kerke sider vele dinghe⁴ gheordineert, daer die uefeninghe der sacramente mede gheciert es, diemen in den beghinne der heilegher Kerken niet en plach. Doe Moyses Aaronne den bisscop ende sine sonen consacreerde, doe storte hi die heileghe olie alsoe mildelec op Aarons hoet, dat si nedervloeide op sinen baert, ende van sinen baerde tote in den soem⁵ van sinen cleede. Ende dit was ene figure der overvloedegher rijcheit van gheeste, die die apostelen ontfinghen op den cinxen dach. Ende hier omme alsemen besscoppe consacreert, soe stort men die heileghe crisme overvloedechlec op hare hoet, op dat si den gheest Goods ontfaen alsoe overvloedechleke, dat alle die werelt van hare heilecheit gheleert ende ghebetert moghe werden.