LXX. Van neghen vlecken van liede die onwerdech sijn priestercap te hebbene

Nochtan¹ seldi weten dat alle die sonen, die van Aarons sade quamen, die en mochten alle niet priesteren werden. Want daer waren ute ghenomen die blinde, ende die houtende², die te groete nasen hadden ochte te cleine, ochte die cromme verwronghene nasen hadden; die den bult hadden, ochte die te sleten waren³; die onsuvere hoefde hadden, ochte die eneghe swarte vlecke in hare aensichten oppenbaerden, ende eldere⁴ an haren lichame van droe- gher rudecheit⁵. Siet, dit waren alle ghebreke ende vlecken ane den lichame, diemen bekinnen ende sien mochte met den oeghen van buten: ende deser vlecken wat ·ix· Ende soe wie dat eneghe vlecke van desen ·ix· over heme hadde, hi en mochte die heileghe salve der priestercap niet ontfaen, noch dienen in den tabernakel Goods. Alsoe ghelikerwijs soe sijn ·ix· manieren van sunden, ende dat sijn gheesteleke vlecken: soe wi eneghe van dien in heme heeft, hi en mach die olie des heileghen Gheests niet ontfaen; ende al wert hi ghewijt, ochte al es hi ghewijt, hi en es nochtan niet werdech te dienne ten heileghen outare Goods.