LXXIII. Vander derder, vierder en vyfter vlecken

Hier na volcht die derde vlecke, dat waren die al te groete nasen hadden; die vierde vlecke, die al te cleine nasen hadden; ende die vifte vlecke, cromme verwronghene nasen. Met elker vlecken van desen drien soe verstaen wi ene sonde die den mensche middelt, ende let te comene in rechten gheloeve ende in kinnessen alre doghede met onderscede¹. Die ierste, die te grote nasen hadden, dat sijn die ghene die hen selven ghenughen, ende altoes bliven in hare oude ghewoente, ende hare leven ende hare werke niet en aensien vore die gherechtecheit Goods: ende daer omme levense sonder godleke vrese, ende glorieren in hare gheloeven, want hen dunct dat si rechte gheloevech sijn ende Gode wel betrouwen²: ende alsoe bliven si traghe ende roekeloes in sinen dienste, ende onachtsam sijnre eeren. Dese hebben den nase te groet, ende daer omme treckense te vele gheests in hen, dat es te vele betrouwens; want hen ghebrect gherechte minne ende vrese: ende hier omme blivense altoes te traghe vore die gherechtecheit Goods³. Die andere, die den nase te cleine hadden, dat sijn die ghene die uutwendeghen erenst hebben tote allen goeden werken, ende nochtan altoes van binnen in hen selven onghecust bliven⁴, ende en dorren Gode alles dies hen noet es niet betrouwen⁵. Dese lijn al te vreesachtech, want si hebben den nase te cleine. Ende hier omme en treckense niet in hen den gheest van groeten betrouwene, want hen ghebrect hope ende minne: ende hier omme blivense te traghe vore die goetheit Goods. Die derde partie, met den crommen nasen, dat sijn die ghene die al willens twivelen in eneghen poente des gheloefs, ochte in enegher ufeningen der heilegher Kerken, ende die van haren verstane meer houden dan van den waerden der heileghen, ende hen selven bat gheloeven dan iemanne anders. Dese hebben alle cromme verwronghene nasen, ende daer omme trecken si in hen enen verkeerden gheest, ende bliven altoes onverlicht van Gode, want si sijn al te traghe hare eighenheit te latene, ende onderhoerech te sine der waerheit Goods. Desen ghebrect oec godleke minne, ende dat es die eighenste sake dat si willens twivelen moten int gheloeve⁶.