LXXII. Vander anderen vlecken

Die andere vlecke dat es al houtende gaen; ende dit houten es oec in ·iij· manieren. Die ierste houtende dat sijn die ghene, die Gode willen dienen ende der werelt, ende elken gnoech sijn: dese houten in beiden siden. Die andere houtende dat sijn die ghene, die Gode begheven ende ertsche rijcheit begaren ende verkiesen: dese houten ter slinker siden. Die derde partie die houten dat sijn die ghene, die hen selven meinen in allen dinghen, die alle hare goede werke werken alse ghehuurde knechte, omme haren eighenen loen; die hen meer verlaten op hare eighene werke, dan op die trouwe Goods; ende en soude hen God niet loenen, soe en woudense heme niet dienen: dese houten alle ter rechter siden. In dese ·iij· manieren van houtene es besloten alle ghirecheit, want si es die andre vlecke die den mensche onwerdech maect den heileghen Gheest te ontfane, ende der eninghen Goods¹.