LXXXI. Hoe dat Christus onse hande ende voete dwaet, ende hoe hi ons wiet

Doe Moyses Aaronne ende sinen sonen ghedwaghen hadde hare handen ende hare voete, doe cleedde hi den vader, alse enen besscob, met ·viij· ornamenten, ende sine sonen met vieren; ende hi bespraide beide die outaere seven werven met watere; ende doe nam hi die heileghe olie, ende daer mede salfde hi ende heilechde beide die outaere, ende dat tabernakel met al dien dat heme toe behoerde; ende hi storte die heileghe olie op Aarons hoeft, ende met der selver olien consacreerde hi Aarons hande ende sijnre sonen, ghe- liker wijs dat onse Here gheboden hadde. Ende doe brachte Aaron ende sine sonen ·j· calf vore die dore des tabernakels, ende op dies calfs hoet leiden si hare hande ende offerdent Gode vore hare sonden. Ende Moyses doedde dat calf in die jeghewordecheit Goods, vore den tabernakel, in die noertside des outaers. Ende doe nette Moyses sinen vingher in dat bloet, ende bestreec die ·iiij· hoerne des outaers, ende daer mede wart die outaer gesuvert ende gheheilecht. Al dat ander bloet storte hi op dat fundament des outaers, ende al dat vette dat die binnenste bedecte, ende dat netteken der leveren, ende die ·ij· nieren, ende dat vette dat over hen was, dat offerde hi al den viere, op dien outaer Goods. Dat vleesch, met der huut, ende met den messe, dat verberrede hi al buten den volke, alsoe alst onse Here gheboden hadde, want het was ene sacrificie vore sonden¹.

Nu merct, ic hebbe u vore gheseghet dat wi met Moysesse Christumme verstaen. Wille wi nu Gode werdeghe offerande doen, soe moet Christus dwaen onse hande ende onse voete, dat sijn onse werke ende onse begheringhen, ende dit leert ons dat lavoer, dat vore den tabernakel stont. Hier na mote wi ghecleedt sijn met alle den doechden, die ons die ornamente bedieden, ende sunderlinghe ieghewelc na sinen staet. Ende dan sal Christus dwaen beide onse outare seven werven met watere; want enecheit onser herten, ende vriheit ons willen, die selen ghesuvert werden van ·vij· manieren, dat es van allen manieren van doetsonden. Ende hier na nemt Christus sine heileghe balsame, dat es den heileghen Gheest, ende die verdiente sijnre werdegher doet: hier mede salft hi ende heilecht beide onse outare, dat es enecheit onser herten ende vriheit ons willen. Want ghi selt weten dat alle gheloeveghe in Christo Jhesu eens herten sijn ende eens willen, ende dit leert ons die figure. Want onder alle die Joden en was maer ·j· outaer der sacrificien, die bediet ons eendrachtecheit onser alder herten. Die guldene outaer bediet ons dat wi alle selen leven in enen wille, ende in eenre minnen, ende in eenre vriheit in Christo Jhesu: ende dan sal Christus salven ende heileghen al dat onsen tabernakel toe behoert, dat sijn alle die goede werke die gheufent werden in kerstenen gheloeve, die ontfaen hare heilecheit ute sijnre verdienten. Ende hi stort sine heileghe olie op Aarons hoeft, dat es op dat overste ons gheests; ende van daer vloyt si neder in alle onse crachte, tote in den zoem van onsen cleede, dat es tote in onse lijfleke ghevoelen: hier mede werden onse hande, dat sijn onse werke, gheheilecht. In eenre andere wijs moghe wi verstaen met Aaronne² sente Petre ende die heileghe apostelen, want si ontfinghen die heileghe olie overvloedechlec alse besscoppe³, gheliker wijs dat vore gheseghet es.

Hier na volcht die consecracie met alle der offeranden die daer toe behoert.