XCI. Vanden iersten broede

Nu verstaet, dat ierste broet dat Aaron offerde in der figuren, dat was met olien ghecneden ende in enen oven ghebacken. Ende alsoe es onse ierste broet in der waerheit¹. Want die hemelsee Vader heeft ons ghegheven die olie sijnre ontfaermherticheit, dat es sinen Sone, want sijn name es ene ute ghestorte olie², sprect die bruut in de Cantiken. Ende Maria die gaf die edele tarwene bloeme; ende die heileghe Gheest heeft olie ende bloeme te gadere ghecneden, ende heeft ons ghemaect ende ghebacken dat suetste broet, dat ye ghewart, dat ene spise es der inghele ende der menscen. Ende dit broet es ghebacken in den oven, dat es in den lichame der reynre maghet Marien, die wel doerheidt³ was met den viere der karitaten⁴.