XC. Vander rechter scouderen ende den ·iij· broeden

Ende ieghewelc priester sal Gode offeren ·iij· broede sonder heefsel, ende sinen prelaet die rechte scoudere, ghelikerwijs dat Aaron dede in der figuren. Met der rechter scouderen verstaen wi oetmoedeghe ghehoersamheit, die wi sculdich sijn onsen prelaet die ons regeert van Gods weghen¹. Met den ·iij· broeden verstaen wi dat dat levende broet des hemels ons ghegheven es drievoldegher wijs², ende alsoe selen wijt Gode offeren; want dat levende broet des hemels, dat die Sone Gods es, es ons ghegheven een met ons te sine in der naturen, ende onse spise te sine in den sacramente, ende ons te verloessene met der doet³. Dat ierste broet, in der naturen, gheeft heme allen menschen ghemeine; dat ander broet, in den sacramente, gheeft heme ghemeine allen goeden menschen, ende niemen meer en maechs ghesmaken⁴; dat derde broet des verloessens es ghemeine den uutvercoernen, ende niemene meer⁵.