XCIII. Vanden derden broede

Dat derde broet dat Aaron Gode offerde, dat was met olien ghecneden, ende op enen roestere ghebraden, verberrent ende verdroecht als eene corste, ochte als scerf. Ende dit moghen wi eighenleec merken in onsen Here Jhesum Christum, die onse levende broet es. Want die olie der ontfaermherticheit was so vaste gheenicht sijnre menscheit, dat hi beide te gadere leverde op den roestere des crucen. Ende dat vier der minnen ende der maertielien was so staere ende so heet, dat onse broet wart verberrent ende verdroecht alse ·j· scerf: want in dien waerden lichame en bleef niet ·j· dropel verscheiden¹. Dit broet es alsoe hemelsch soete, met rechte souden wi glorieren², boven alle dinc, in die minne ende in die ghehoersamheit, die dit broet ghebacken ende ghebraden heeft.

Ende hier omme selen wi deser drier broede met minnen ghedinken ende offerense Gode; ende alsoe selense sijn onse gheesteleke spise ende onse leven, gheliker wijs dot ons die Joden leren met der figuren. Want ute den vollen corve verberdensi ·iij· broede, ende alle die andere broede bleven hen ter spisen. Ende onse broede sijn oec derf, onverhaven³, gheliker wijs dat die broede der Joden waren. Want in der gheboerten, ende in den levene, ende in der doet ons Heren en vinden wi anders niet dan onnoesele oetmoedeghe ghelatenheit, meerre dan wi ghedinken ochte verstaen moghen⁴; want die waerheit moet recht antwerden der figuren⁵. Ende hier omme, in den beghinne der Sinagoghen ende der joetscher wet, doe die weder der consecracien Gode gheoffert wart met den drien broeden, doe wart Aaron gheconsacreert met sinen sonen overmids Moysesse sinen broeder⁶, die in dien tiden was die overste prince, ende oec in den ambachte alse bisscop der Joden⁷. Ende alsoe gheliker wijs in den beghinne der heilegher Kerken ende der kerstenre wet, doe die doechde Gode gheoffert worden die in der figuren betekent waren⁸, doe worden die Apostele gheconsacreert overmids Jhesum Christum haren broeder, die prince ende bisscop was alle der werelt: want heme es alle macht ghegheven in hemel ende in eerde⁹, ende die macht sal eweleec duren. Ende ieghewelc priester die sijns selfs verloechent ende heme Gode gheoffert heeft, ende die gheboerte ons Heren ende sijn leven ende sine passie met devocien in sijn herte dreecht, hi es Gode gheheilecht, ende Christo gheenicht, ende gheroepen, ende vercoren alse Aaron; want hi es met Christo in Gode ghestorven ende op verstaen. Ende daer omme leeft hi ute Gode, ende es anderwerf gheboren ute den gheeste Gods, ende Christus die gheeft heme sine macht op dat hi met heme draghen ende verbidden moghe die sonden der werelt¹⁰. Ende hi leecht heme, op sine hande, den offer¹¹ daer hi Gode mede gheheilecht es, dat es dat hi heme doet ghevoelen ende verstaen dat hi sijns selfs niet en es, moer dat hi ene eweghe offerande Gods es. Ende overmids die macht ons Heren die in heme es, soe verheft hi hem selven, ende suect ende smaect die dinghe die ewech sijn, ende gheeft heme anderwerf in die hande ons Heren Jhesu Christi¹²: want sonder Christumme en es ghene offerande bequame den hemelschen Vader. Ende Christus ontfeet die offerande ende verberntse, een met heme¹³, in den viere der minnen Gods.

Ende dit leert ons eygheleec die figure; want al dat Aaron ende sine sonen, die eerste priestere der wet, Gode offer- den van den weder der consecratien, dat ontfinc Moyses, dien wi Christumme gheliken, ende leidt¹⁴ Aaronne ende sinen sonen weder op hare hande: ende daer mede gaf hi hen macht, boven al dat volc, dat si die offerande des volcs ontfaen souden, ende voert Gode offeren, ende oec daer ave leven; ende dat si met sacrificien ende met ghebede middelen souden tusschen Gode ende sijn volc¹⁵. Ende doe verhieven si op die offerande¹⁶ vore die jeghenwerdicheit Gods, ende gavense Moysesse anderwerf weder, ende hi verberretse op dien outaer der sacrificien in die eere Gods.