LXXXIX. Van den steerte

Voert gheboet onse Here Moysesse in der figuren, datmen den steert van den weder verberren soude op sinen outaer. Ende alsoe ghebiedt hi nu allen den ghenen die heme gheheilecht sijn, dat si alsoe wederboecht selen sijn in heme met meininghen ende met minnen¹, dat minne verberren moghe alle waeromme die redene ende nature soeken ende begheren mochten in allen goeden werken²; alsoe dat minne ute hare levendere rijcheit ende meltheit alle doechde werken moghe, sonder opsien van eneghen loene in tijt ochte in ewecheit, ghelikerwijs dat ene levende fonteine altoes nuwe water ute gheeft, ende dat water es sonder wederkeer, want dat een water drivet dat ander voert, want het comt ute enen levenden gronde³. Alsoe sele wi oec ute enen levenden minnenden gronde dien wi in Gode besitten, Gode om Gode eenvoldechlec minnen ende dienen, opdat wi eweleec alsoe doen moghen⁴: ende alsoe verberren wi den steert alre andere waerommen⁵ in den viere der minnen Gods.