XCII. Vanden anderen broede

Dat ander broet dat Aaron offerde, dat was met olien gheeneden, ende toe in olie ghesoden¹. Ende in der selver manieren so heeft Christus in den Sacramente des outaers bloeme ende olie te gadere ghevoecht; want hi hevet die nature die hi van Marien ontfinc, doergoten met der olien sijnre gracien ende sijnre glorien, ende gheeft ons dagheleex een levende broet dat ghesoden es in die olie sijnre karitaten; want dat underlinghe inwoenen der karitaten, daer alle ghe- loeveghe met Christo vergaderen in enen omvanghe van minnen, daer es² die eneghe omvanc van minne die panne vol olien, daer onse broet inne ghesoden wert³. Die begherte die Christus hevet tote onser salecheit, ende die wi hebben tote sijnre eeren, dese ·ij· begherten stoken dat vier, ende si doen ons die olie sieden daer dit broet inne ghebacken wert. Dit broet selen wi Gode al heet offerer, ende al heet sele wijt eten, ochte en smaect ons niet. Ende alsoe dadent die Joden in der figuren.