CI. Vanden tween jonghen huus duven

Nu hebbe ic voert ane ghesien, op dat ic elcken gnoech doe¹, dat vele aermer sonderen sijn² die hare sonden bekinnen, die noch gheite noch scape en hebben die si Gode offeren moghen, alsoe alse ic gheseghet hebbe. Ende men vent oec lettel tortelduven in desen lande; want men vent vele menschen die seere becoert werden van den vleesche ende van den viant, ende nochtan goets willen sijn, ende die qualeec clemmen connen in die hoeghe wuestine der hemele, daer men die tortelduven pleecht te vane. Maer na die wet Gods so moghen dese menschen offeren ·ij· jonghe huus duven: die ene vore die sonde, ende die andere al te verberne in die eere Gods. Die ierste duve die men vore sonden offeren sal, dat es versmaden ende haten die sonde; die ander duve dat es begheren ende minnen doechde³. Dese ·ij· duven selen sijn sempel, ende eenvoldich in der meininghen te Gode weert, saechtmoedich in ghedoeghene, ende sonder galle iemene te quetsene ochte te deerne⁴; ende si selen te velde uut vlieghen met den groeten cudde, ende selen die goede coerne ute kiesen daer si bi leven: dat es, dat si altoes wandelen selen met anderen goeden menschen, daer si iet goets ave hoeren ende sien moghen, dies si ghebetert werden.

Ende si selen bi den rivieren ende op die clare watere sitten⁵, ochte enich voghel van boven quame diese vaen ende bederven woude, dat sine inden watere overmids sijn beelde bekinnen mochten, ende hen daer vore behoeden. Dat clare water, dat es die heileghe Screfture, ende dat leven der heileghen, ende die ghenade Gods. Hier inne sele wi ons spieghelen alse wi becoert werden: soe en mach ons niemen deeren. Dese duven sijn heet van naturen, ende bringhen dicwile jonghe duven; want alsoe dicke alse wi, omme die eere Gods ende omme onse salicheit, die sonde anesien met onwerden ende met hate⁶, ende die doecht met minnen: soe bringhe wi jonghe duven, dat sijn nuwe doechde.

Dese ·ij · duven salmen offeren in des priesters hande, te doedene alsoe alst gheboden es in die wet Gods: maer dese offerande behoert te armen lieden. Ende so wat mensche die meer mint sijn eighen goetduncken ende sinen wille dan sijns prelaets wille, die en es gheen willich aerm mensche, noch hi en can oec die sonden volcomeleec niet ghelaten; want hi mint die wortele der sonden, dat es sinen eighenen wille dien hi met rechte laten sonde⁷. Ende dit es die sake⁸ dat die inghel viel in den hemel, ende die mensche in den paradyse: ende aldus vallen si noch die eighens willen sijn, want hen ghebrect die ierste duve, die si vore sonden offeren souden. Want si souden sijn eenvoldich, saechtmoedich ende sonder galle⁹; ende si sijn scalc, ende wederspeenich¹⁰, ende al vol bitterheiden ende venijns van binnen¹¹ daer si hen selven mede bederven¹², ende oec bi wilen anderen menschen scadeleec sijn. Die andere duve dat es Gode minnen ende ufenen meer dan alle doechde¹³: want Gode minnen dat es die wortele alre doechde. Ende hier omme eest goet dat wi ons Gode offeren in die hande ons priesters, dat hi ons breke onsen overmoedeghen hals ende die vloghele onser eighenre macht¹⁴, alsoe dat wi sine werden ende Gods¹⁵, ende dat plumen ende crop (dat es werken ende leven) Gode gheoffert si. Ende die priester sal onser duven den hals op scoeren, ende met den bloetstortene sele wi onser eighenheit vertien onder onse overste, omme die eere Gods ende vore onse sonden. Ende wi selen Gode meer uefenen met minnen dan alle andere doechde: so sele wi werden een salich offer Gods; ende dicwile ons selfs vergheten, ende te male verberren in minnen¹⁶. Dats die andere duve.