XXXII. Ut creaturae omnes, quomodò vivere debeamus, nos instituunt; et de vita spiritali ac interna: itemque de mala ac bona voluntate

Nu verstaet ende merct met ernste, alle creaturen die wisen en̄ lecren hoe wi leven selen; die nature der hemele en̄ die ordinancie die hem God ghegeven heeft, die sijn ons exemplaer en̄ een ghewarighe figure hoe wi Gode selen leven boven diè elemente in die hemele, overmits een inwendich verborghen gheestelijk leven, dat nieman en weet noch en ghevoelt dan diet leeft, diet oefent en̄ dies pleghet. En̄ dit inwendighe gheestelije leven beghint aldus.

Onse hemelsche Vader maect in onse binnenste een inwendich gheestelic firmament, eest alsoe dat wi volghen der natuerliker gheneychtheit onser sielen, die God ons allen ghegeven heeft, en̄ die altoes van naturen goet begheert; want si is die ierste materie die God in onser sielen ghescapen heeft, en̄ die van eyghenre naturen altoes goet begheert. Mer si wert dicwile verdonkert overmits grofheit der sonden. En̄ al is die nature goet die God ghescapen heeft; en̄ al behaghet sy Gode in bloter naturen, nochtan behoevet si hulpe sire ghenaden, salsi boven haer selven comen. En̄ hier omme, alse wi cesseren van onsen groven sonden, en̄ die ghenade Gods soeken en̄ begheren, dat is dat hoechste dat wi van naturen vermoghen. Maer alsoe langhe als die wille quaet is en̄ quaet wilt sijn, soe is die mensche contrarie Gode en̄ allen sinen gaven, en̄ hi en mach doghet, wijsheit noch waerheit leven noch verstaen, en̄ hi is van Gode versmaet en̄ ondeelechtich alles dies goets datmen begheet in hemel en̄ in erde¹.

Een quaet wille is fondament en̄ beghinne van allen quade, en̄ die daer in blijft en̄ sterft, hi en vynt nyegherines stat dan in die helle metten verdoemden gheesten. Alsoe ghelikerwijs die goede wille, daer God in leeft en̄ regneert met allen sinnen gaven, hi is wel ghelijc den firmamente des hemels, want hi wert altoes beweghet van boven vanden heylighen Gheeste, die die ierste beroeringhe es alre heylicheit. En̄ dit firmament is doerschinich en̄ claer vander inwoninghen Gods, en̄ oec vander sonnen der wijsheit die daer inne leeft. En̄ hier omme is dit firmament een gheestelic middel dat deylt, en̄ ondersceyt ghevet tusscen die watere der hemele en̄ die watere der erden, dat is tusscen die doghede en̄ werke der doechde, tusscen tijt en̄ ewicheit, tusscen een uutwendich werkende leven en̄ een inwendighe gheestelic leven, tusscen gracie en̄ nature, tusscen tekene en̄ waerheit, tusscen sinlike werken die vergaen en̄ gheestelike werken die ewich bliven, die in gracien sijn ghedane².