XXXIII. Driplicis coeli ac stellarum descriptio

Die nature der hemele besteet in drie principale hemele: die ierste hemel heet firmament; die ander hemel cristallen; die derde hemel vuerich claer: en̄ si sijn alle doerschinighe claerheit, en̄ woninghe, en̄ wandelinghe daer God in regneert en̄ levet met allen sinen heylighen. Die overste hemel, metter inwoninghen Gods, betekent ons een scouwende leven, ghelikerwijs dat ic voren gheseit hebbe. Die ander ‧ij‧ hemele bedieden ons een verborghen inwendich gheestelic leven, daer wi met Gode in wandelen ende God met ons, overmits sinc gracie ofte sine glorie. Die ierste hemel, daer die sterren aen staen, die beteykent ons die ewighe moghentheyt ons hemels Vaders, die ons intrect en̄ verheft boven alle sinlike werke in een inwendich gheestelic ghevoelen, daer alle doechde in leven en̄ gheoefent werden. Daer sijn wi den hemelschen sterren ghelijc, die groet sijn daer boven vore die yeghenwoirdicheit Gods, en̄ cleine schinen hier beneden vore der menschen oghen, die anders niet en bekennen dan teyken der doghede die si van buten in goeden werken horen en̄ sien¹. Die sterren en sijn niet doerschinich ghelijc den hemelen, en̄ si sijn ront van figuren, en̄ si gaen omme metten firmamente daer si inne staen, yeghewelke in hare eyghene stat, hoghere en̄ nedere, mere en̄ mindere, onghelijc van namen en̄ van ghedaenten, en̄ van crachten, en̄ van claerheden hier beneden en̄ daer boven, na diere wijs dat si van Gode gheciert en̄ gheordent sijn. Si en lichten van hem selven niet als die hemele doen; maer si onfaen licht en̄ claerheit vander sonnen en̄ vanden hemelen, en̄ si blicken en̄ wederblicken ghelike guldenen vaten in claerheit der sonnen. Si verclaren den nacht, en̄ si bewisen den sciplieden de havenen die si begheren; maer si wiken inden daghe in claerheit der sonnen, en̄ si gheven haer cracht hier beneden in die elemente, in al dat leeft en̄ wast inder erden en̄ boven die erde, in die watere en̄ in die lucht.

Nu verstaet en̄ merct hoe ons die hemele metten sterren inwendich hemelsch leven leren.