XL. De Marte et qui sub illo nascuntur

Hier na volghet die derde planete, van boven nedercomende¹, die heet Mars, heet en̄ droghe, scale, nydich en̄ wreet, en̄ hi ghelijet Saturno in vele punten. Die menschen die onder hem gheboren werden, die sijn van naturen droghe, inborstich², ondoechsam³, onunstich⁴, onghemeine⁵, niemen vrient, niemene goed doende dan den ghenen die hem vrient schinen, en̄ goet doen. Si sijn heet ende wreet van complexien, haestich van moede, licht gherenen, lichte ghestoert ende saen verbolghen, langhe ghedinkende, node verghevende, gherne wrekende, lichte bedroeſt, scalc in spre- ken: altoes dunct hem dat si recht hebben, want onbekende hoverde is in hem verborghen⁶. En̄ als die menschen gheestelic willen werden, soe nemen si ane enen ghetoenden scijn van buten, daer si den menschen inne behaghen moghen: dat sijn grote werken van penitencien die onghemeyne sijn in goeden menschen⁷, als vele zwighen ofte van hoghen dinghen spreken⁸. Eest dat si subtyl sijn van naturen, alle andere goede menschen ordelen sy en̄ doemen die van hare heylicheit niet en houden⁹. Siet, dit sijn hoverdighe gheveinsde menschen, die onhebbelie sijn die gracie Gods tonfane. Mer wat den mensche onmoghelie is, dat is Gode moghelic die alle dinc vermach.