LXX. De tribus specialibus vitae praesentis solennitatibus, et quarta, quae in extremo die celebrabitur

Die Ordinarys van onser regulen¹ hevet in hem ‧iij. sonderlinghe feesten int jaer, die altoes vernuwen in behoirliken tiden, met nuwer bliscap van menigher oefeninghen inder heyligher Kerken. Die ierste feeste leghet inden winter, die ander inder lenten, en̄ die derde inden somer.

Die ierste feeste is inden winter, beghin eewichs levens en̄ alre salicheit, dat die Vader gaf sinen Sone, in onser naturen onfaen en̄ gheboren vander Maghet Marien, God en̄ mensce, met ons te sine.

Die ander feeste is inder lenten, die leert ons dat Christus, die Gods Sone, hem selven ons gaſ tonfane inden Sacramente, en̄ overgaf inden wille sijns Vader, en̄ inde hande der felre Joden, te stervene om alle die ghene die hem gheloven selen, en̄ hem ter eren den sonden sterven selen: want die selen alle mit hem opverstaen in die glorie Gods. Dit is die feeste van Paschen die alle ghelovighe verblijt met sonderlingher vrouden ewichs levens.

Die derde feeste is inden somer, dat die Vader metten Sone gaf sinen Gheest sinen Apostelen opten Sinxen dach, die hemel en̄ erde hevet vervult: en̄ alle die in hem gheloven, hopen en̄ minnen, die sijn alle vol ewigher bliscapen ende salicheiden.

Die vierde feeste die noch toe te comen is, die wi ontbeiden, verlanghen, gheloven en̄ begheren, dat is die leste dach der werelt, dat Christus comen sal vanden hemel hier neder, met groter macht en̄ moghentheit, met inghelen en̄ met sinen heylighen, ordelen quade en̄ goede. In dien daghe selen alle feesten, en̄ alle hoghetiden die verganckelic sijn, volbracht werden in éne feeste en̄ in énen gloriosen dach, die ewelijc dueren sal. En̄ Christus sal die sine, die hem ghedient hebben en̄ sinen hemelschen Vader, ghebenedien en̄ vueren in sine glorie, die hem bereet es van beghinne der werelt. En̄ hi sal vermaledien die hem nu versmaden en̄ sine ghebode, en̄ salse met sijnre gherechticheit senden, metten duvelen, in dat helsche vier, dat nemmermeer ghebluscht en wert.

Dit is die Ordenarys der heyligher Kerken in kerstenen ghelove: dies niet en gheloeft, hi is verdoemt.

Noch sijn vele ander feesten int jaer van onsen Here en̄ van sinen heylighen, diemen ghemeenlic eert en̄ oefent in die heylighe Kerke; en̄ selke, sonderlinghe en̄ allene, werden gheoefent en̄ ghevicrt inden lande daer die heylighen woenden, leefden en̄ storven in die ere Gods. Alle dese feesten selen volbracht werden, inden lesten daghe, in éne glorie Gods, hem allen ghemeine en̄ yeghewelken sonderlinghe, na sine werde. Dit is dat rike Gods en̄ sijnre familien.

Footnotes

1. Sur. Canonis nostri Ordinarius, ut vocant. ↩