LXXI. Ut Dominus Jesus sit liber noster horarius, et in quem finem cuncti monastici ordines instituti sint

Christus selve is onse regule; sijn leven en̄ sine lere es onse Ordinarys, en̄ onse ghemeine Breviarys in alle die werelt. Dien selen wi met ons draghen, waer wi sijn: sine passie en̄ sine doot in onse memorie sonder vergheten; sijn minne en̄ trouwe in onse herte, met loste en̄ met liefden beseten; sijn gloriose leven wonende in onse minnende ziele. Dat is onse spise, alsoe moghen wi ewelic eten. Dit is een ghemein breviarys den leken en̄ den gheleerden. Die hier na leven, en̄ hare ghetiden houden, die selen ten ordele Gods Christo antwoerden en̄ coenlijc spreken: ‘Here, wi begheerden u te behaghene, en̄ u ewelic te levene en̄ te dienene.’ En̄ hier omme soe hebben vele heylighen ordinen en̄ state van religien ghesticht, onghelijc van abite, van ordenen, van wisen, van manieren, van oefeninghen ende van ghetiden, daer si Gode in loefden en̄ dienden: en̄ yeghewelc van hem allen begheerde en̄ meinde te levene, en̄ te stervene, in die wise die hi voir hadde, naden liefsten wille Gods. En̄ hier omme sijn alle ordinen, en̄ alle state van religien, vergadert ende ghefondeert op één ſondament, dat is Christus Jhesus: hi is beghin en̄ einde van allen goede. Overmits hem, en̄ in sinen name, sijn alle dinghen volmacet ende wel gheordent in hemel, in erde ende in allen goeden menschen die hem dienen. En̄ hier omme hevet die heylighe Kerke, in sinen name ende in die ere sijns Vaders, en̄ overmits den heylighen Gheest, gheordineert menichvuldighe wisen van dienste in sacrificien, in offerhanden, in oefeninghen van binnen, in goeden werken van buten, in Missen, in penitencien, in abstinencien vore sonden, met oefeninghen der ‧vij‧ Sacramenten, en̄ metten ‧vij‧ ghetiden, die alle menscen sculdich sijn te houdene, met kerstinen ghelove, in enigher wisen die si verkiesen, daer si in begheren Gode te levene na sijn behaghen.