LXXXIV. Hora Completorii. De sepultura Domini Jesu

Ende om dat dit was die leste ure vanden daghe, die wi Compleeten noemen, soe en mochten si niet langher werken dan die ure. En̄ bi diere stat daer Jhesus ghecruust was, soe was een hof; en̄ daer in was ghehouwen een nuwe graf in enen steen. Ende met haesten, om die feeste en̄ om die vierte te houdene, leiden si den lichame daer in. En̄ si hadden bereit dierbare specie van edelen roke, mirre en̄ aloë, omtrent hondert pont: die stortensi opten lichame Jhesu en̄ in sinen wonden, daer hi lach in dat nuwe graf, daer te voren noyt nieman in gheleghen en hadde. En̄ si wintelden enen groten steen, als eenen sarck, vore die dore vanden grave, ende si ghinghen van daer met goeden moede, in groten vrede, dien Jhesus bereet hevet sinen discipulen die sine regule houden die hij leefde en̄ leerde, en̄ daer hi in ghestorven en̄ opverstaen is, in die glorie sijns Vader. Amen.